يُعتبر الزجل جزءاً أساسياً من التراث المحلي المتعلق بالتعبير الشفوي، وقد نظم طانيوس جعجع قصيدتين لا يزال أهالي بشعله يردّدون بعضاً من أبياتهما حتى اليوم.
-ضيعتنا اللي حضنتنا ومتل الأمّ ال ربّتنا
فيها خلقت وفيها بعيش وما بنتركها ولو متنا.
ضيعتنا غامرها النور مشرورة عا راس التلّ
مسيّجها ورد ومنتور بتضحكلك لمّا بتطلّ
مواسمها فواكه وعطور وزيتونا أخضر بيضلّ
عاصَر نوح وعاش دهور وبعدو حارس ضيعتنا.
أكتر أيّاما خضرا وعرسا أبيض بِكانون
التلج بيغمرها غمرة وبيكلّل هام الزيتون
واللي التاريخ بيقرا بيعرف هالسرّ المكنون
ال عاملّا صيت وشهرة: زيتوناتا وكرمتنا.
-يا ضيعتنا محلاكي ومحلا العيشة بهواكي
لو رحت لجنّة رضوان قلبي مُش رح ينساكي.
لو رحت لجنّة رضوان ما بنساكي بالمرّة
يا ضيعة فيكي شبّان بتحلّي العيشة المرّة
وفيكي زينات ونسوان عا كتافن محلا الجرّة
حاميكي ربّ الأكوان وجفن البدر مغطّاكي.
ضيعتنا بجرد البترون مشهورة بكلّ البلدان
فيها شجرات الزيتون مزروعة قبل الطوفان
ومْزارات الفيها حصون ديورة مزنّرها السندان
ومْناخا بيسلي المحزون وبيفرّح قلبو الباكي.
فيها العنب فيها التين ونجاص وخوخ وتفّاح
بناكل من آب لتشرين وبيضلّوا لكانون ملاح
مواسمنا فيها الحلوين زنودا بتقطف وبترتاح
والأشجار شمال يمين عا غصونا تمْرا تاكي.
!!!!!!!!!!!!!!!!!!!!!!!!!!!
-معنّى من نظم الأستاذ حنّا جعجع
مهما عن الزيتون قلنا يا سلام
خبار وقصص عاجز يوضّحها الكلام
بيكفي إذا العالم عرف زيتوننا
حملت حمامة نوح من غصنو السلام.
زيتونة ال بسطت علينا فروعها
رويت عطشنا من عصير دموعها
التاريخ بارك جهدها وممنونها
ونحنا برموش عيوننا بنصونها
تباهت بشعله بزيتها وصابونها
وصارت رمز: آدابها وفنونها
وحملت غصونا الدهر وبعبّا اختفوا
ألوف السنين وعشعشوا بجزوعها.
يا عاصر الزيت المقدّس هالسنة
معبّى الخوابي والقناني مزيّني
اللبنة بتحلى ومأكل الكبّة هَني
وتبّولتك تحت الضراس محلوني
بدونو ال بابا غنّوج بتعزّو الدني
والبيض مقلي بزيت أكلة ترخني
سلطة وزعتر طعمتن متل العسل
أحسن دوا بيشفو المراض المزمني.
!!!!!!!!!!!!!!!!!!!!!!!
-قرّادي
الزيتون ال عنّا مشجّر روعة محبحب ومزهّر
بيتّاكل أخضر مرصوص يمّا مجرّح ومجرجر.
يا محلا قطف الزيتون ولو كان بصقعة كانون
أروع منّو ما بيكون مكلّل بالتلج وأخضر.
الزيتوني علينا بتمون بنحرسها بأجفان عيون
وال ما بيدوق الزيتون بيقضي عمرو يتحسّر.
يا ريت بنزرع يا ريت شي زيتونة حدّ البيت
تا نستخرج منها الزيت وأحسن صابون معطّر.
!!!!!!!!!!!!!!!!!!!!!!! –
يا حلِوهْ ال حارقة قلبي بِ شعله
يا محتكرا حلاكي والبشع لي
أنا من ضيعة ال إسما بشعله
غصن زيتونها طال السحاب.
عا صدري تربّعي وبالقلب غِلّي
وسعر الحبّ دخلك ما تغَلّي
ومن بشعله خدي زيتون غلّة
وزيت صافي متل لون الدهب
!!!!!!!!!!!!!!!!!!!!!!!!
-دلعونا مأخوذة من بعض نساء ورجال بشعله
على دلعونا وعلى دلعونا
زيتون بشعله أفخر زيتونا.
الزيتوني اشتاقت للي زرعوها
وزيتات الموني منها أخدوها
عودوا دخل الله عودوا شوفوها
الأوراق اصفرّت دبلو الغصونا.
طلعت عا بشعله تا تزور دياري
لقيت عالعتبة انحفرت أشعاري
يا محلا العيشة بضيعة أسراري
نفرط ونمشّق حَبّ الزيتونا.
الدلعونة مشهورة بالتراث وقد اضيف عليها بعض الأبيّات
على دلعونا وعلى دلعونا
يا محلا عنّا قطف الزيتونا
يا طير الحبّ الطاير بالعالي
ودّي سلامي لَيلّي ببالي
ولو زرت بشعله والهوا شمالي
جبلي بمنقارك غصن الزيتونا.
لو متّ بوصّي: أوعا تبكوني
حطّوني بنعشي وغنّوا وزفّوني
فتحولي قبري بفيّ الزيتوني
وشيلو من زيتا لجروحي دهونا.
شفتا للحلوِة تحت الزيتوني
من أوّل نظرة انطبعت بعيوني
وعلقت بقلبي أوعا تلوموني
بِحبّا صرت مدودخ مجنونا.
زيتون مجرجر زيتون الأخضر
من دونو السفرة مُش ممكن تعمر
والقلب بيفرح ساعة ما بيظهر
من منتوجاتو أفخر صابونا.
!!!!!!!!!!!!!!!!!!!!!!!!!
موليّا مشهورة جدّاً في التراث، وقد ضاف عليها بعض الأبيات
ليّا وليّا ويا بنيّا يا ليلى ردّي عليّا
وعالزيتونات لاقيني تا نلمّ الحَبّ سويّا.
شفتك تحت الزيتونة عشقتك والناس لاموني
وما عاود شفت بعيوني إلّا وجّك ليليّا.
تحت الزيتونة نعستي وياماعا إيدي كبستي
تا نسيت كتاب مدرستي وحروف الأبجديّا.
بارك الله الزيتونة ال من حبّا خدنا موني
وبِزيتات العيروني غمّسنا الكبة النيّا.
!!!!!!!!!!!!!!!!!!!!!!!!!